“ PËRRALLAT E DETIT”

- Vëllim me përralla -

Autor: Bardhyl Xhama          

Shtëpia Botuese “EXTRA”

Recensë

                                   Vëllimi : “Përrallat e detit”,  i nderuar me çmim inkurajues në vitin 1975, është ribotuar nga Shtëpia Botuese  “EXTRA” pas gati tridhjetë vjetësh.

                                   Autori ka bërë përmirësime te ndjeshme në këtë ribotim, duke ia ngritur nivelin artistik e gjuhësor, në përshtatje të moshës  së nxënësve të cilëve u adresohet.  Në  këtë vëllim janë përmbledhur nëntë përralla mbi  jetën interesante të  kafshëve dhe të peshqve të botës së nënujshme, të deteve e oqeaneve.

                                    Vlera e këtij vëllimi të përmirësuar shtohet së tepërmi nga ilustrimet e goditura të piktorit të talentuar Llazar Taçi, nga  cilësia e botimit të shtëpisë botuese, si dhe nga struktura e lëndës që përfshihet në të, si përmbajtja në fillim me ilustrimet e zvogëluara, përrallat, pasthënia, të dhënat e shkurtra për peshqit dhe aparatin pedagogjik në ndihmë të mësuesve e të nxënësve.

                                     Veçojmë faktin e përfshirjes në vëllim të aparatit pedagogjik ndihmës..

                                     Libri është i përshtatshëm për nxënësit e klasave të treta e të katërta të shkollës fillore.

                                     Përrallat kanë nivel artistik e gjuhësor dhe janë me  karakter edukativ e shkencor. Ato janë thurur në mënyrë të tillë që të fitojë e mira ndaj së keqes. Përmes tyre del në pah  se bashkimi bën fuqinë, se trimëria e zgjuarsia dalin  fitimtare, se bamirësia e miqësia janë virtyte me vlerë etj.

                                     Përrallat do te lexohen e do të kuptohen mirë nga lexuesit e vegjël, sepse:

                                     Së pari,  të gjithë emrat e peshqve, pa asnjë përjashtim, nuk janë të shpikur nga autori, por  realë.  Në detet tona ka  banorë me emra të tillë: peshk elektrik, peshk gjel, peshk therës,  kali i detit, dhelpra e detit, derri i  detit, peshk balerinë, peshk akrep e të tjerë.

                                      Së dyti, disa nga fabulat e përrallave, ngjarjet  dhe episodet që përshkruhen, janë bazuar  jo vetëm në instinktet e llojeve të peshqve, por edhe në emrat e tyre..

                                     Së treti, përshkrimi i peshqve e kafshëve të detit, madhësia, ngjyra etj., përgjithësisht, janë bërë me saktësi. Shumica e“personazheve” të përrallave janë edhe banorë të deteve Jon e Adriatik.

                                     Dhe, së fundi, në libër jepen me një titull të veçantë të dhëna të shkurtra për disa nga llojet e peshqve që janë “personazhe” të përrallave, apo që u përmendet emri,  me qëllim që fëmijët të njihen  sadopak me karakteristikat e tyre,që t’i  kuptojnë më mirë përrallat.

Tiranë, 25 maj, 2006