“Djaloshi që kapte rrufetë”

- Rrëfenja -

Autor: Bardhyl  Xhama               

Shtëpia Botuese “Toena”

R e c e n s ë

              Vëllimi  me 60 rrëfenja i shkrimtarit Bardhyl Xhama është botuar në vitin 2000 nga Shtëpia Botuese “Toena”. Mund të themi se është i libri i dytë,  vazhdim i vëllimit me 50 rrëfenja “Pse qau delfini?”, botim i vitit 1996.

                                      Në Konkursin Kombëtar të Letërsisë për Fëmijë e të Rinj është vlerësuar me çmimin “Bekim Harxhi”.

                                      Shumica e rrëfenjave janë ndërtuar mbi bazën e  fjalëve të urta të popullit tonë, në traditën e tij të vyer për të çmuar të mirën e për të luftuar të keqen.

                                      Rrëfenjat janë të shkurtra, të shkruara bukur e thjeshtë, me gjuhë të pasur, me fraza të zgjedhura e figuracion letrar të kuptueshëm për moshën që u adresohet.

                                      Në të 60 rrëfenjat trajtohen kryesisht probleme të edukimit moral e qytetar të nxënësve, luftohen veset e zakonet e këqija, mashtrimi e vjedhja, mosmirënjohja, dembelizmi e mendjelehtësia etj.; vlerësohen virtytet e mira , puna e dituria, ndershmëria e miqësia e sinqertë, atdhedashuria , trimëria etj.

                                      Janë me vlerë të veçantë edukuese rreth një e pesta  e rrëfenjave, të cilat trajtojnë tema aktuale të ditëve të sotme. Të tilla, për shembull, janë rrëfenjat: “Po ece pas brumbullit, në pleh përfundon”, “Pajtimi”, “Më zgjidh një shejtan”, “Lypsarja e vogël”, “Buka e huaj”, “Gardhi kalbet, armiqësia mbetet” e të tjera.

                                      Libri ka 125 faqe, me kopertinë me ngjyra të Llazar Taçit e ilustrim të rrëfenjave nga piktori Lec Shkreli. Botimi është cilësor  dhe ka qenë u suksesshëm në tregun e librit për fëmijë.

Tiranë, qershor 2006