“  Zjarrfikësi i pyllit”

- Përralla -

Autori: Bardhyl Xhama      

Shtëpia Botuese “N. Frashëri”

R e c e n s ë

                          Vëllimi me përralla “Zjarrfikësi i pyllit”  është botuar nga Shtëpia Botuese “Naim Frashëri” në vitin 1987  dhe nuk është ribotuar më si libër më vete. Disa nga përrallat e librit janë ribotuar në libra të tjerë të mëvonshëm.

                           Libri përmban njëmbëdhjetë përralla dhe ka 65 faqe.  Është i ilustruar bardhë e zi nga piktorja Dolli Gjinali,  e cila ka  bërë dhe kopertinën me ngjyra.

                           Për vlerat e mirëfillta artistike, gjuhësore  dhe edukative, ky vëllim ka fituar çmimin e dytë në Konkursin Kombëtar të Letërsisë për Fëmijë të vitit 1987.

                            Përrallat janë shkruar për moshën e nxënësve të shkollës fillore. Personazhet kryesore që zotërojnë janë kafshë, si ujku, elefanti, gjirafa, lepuri, pelikani, macja etj. Përmes bëmave dhe instinkteve  të tyre shtjellohen ide morale me vlerë  për edukimin e fëmijëve. Fitorja e  së mirës mbi të keqen, është boshti kryesor që përshkon anën edukative të përrallave.

                            Kjo ide del edhe më e qartë në përrallat që kanë personazh njerëz. Kështu, për shembull, në përrallën që hap vëllimin “E mirë fuqia, e mirë dhe urtia” del në pah se vetëm me anën e fuqisë nuk arrin dot të bësh as punë të vogla e as të mëdha, po qe se me fuqinë nuk bashkohet dhe zgjuarsia, dituria, përvoja. Ideja e zgjuarsisë dhe e mençurisë  popullore del edhe në përrallën “Xhuxhum Gjudurumi dhe qerosi”.

                            Në disa nga përrallat fshikullohen veset e këqija, si gënjeshtra, grykësia, mendjemadhësia , mendjelehtësia etj.

                            Në tërësi, vëllimi është një ndihmesë me vlerë në lëvrimin e letërsisë për fëmijë.

Tiranë, gusht 2006