Teksti i  lexuar në dokumentarin e TVSH-së

për 70-vjetorin e lindjes së Bardhyl Xhamës

Shtatëdhjetë vjetori i shkrimtarit, mësuesit , gazetarit dhe studiuesit BardhylXhama, mblodhi plot miq e shokë, bashkëpunëtorë e ish-nxënës të tij në një nga mjediset e Lidhjes së Shkrimtarëve dhe Artistëve. Mësues e drejtor shkolle, pedagog e studiues, gazetar, sekretar Kolegjiumi i gazetës “Mësuesi” , administrator dhe shkrimtar i njohur në letërsinë për fëmijë - ja, ky është Bardhyl Xhama.

Shtatëdhjetë vjet në jetën e një njeriu ndoshta nuk janë pak. Me këndvështrimin e krijuesit, sigurisht që gjërat ndryshojnë. Një këndvështrim të tillë, mjaft origjinal, ka shkrimtari ynë i madh Dritëro Agolli.

“Në atë kohë (bëhet fjalë për fillimin e viteve ’50 në gjimnazin e Gjirokastrës – shënimi im, B.Xh) ka qenë një nga njerëzit që binte në sy, jo vetëm si njeri i mençëm dhe tepër i edukuar, si një nxënës me të gjitha kërkesat për të qenë i shkëlqyer, por ai ishte dhe njeri artist, jo vetën në punën e tij, por edhe në pamje dhe të gjitha. Ka qenë dhe mbetet tepër simpatik. Atëherë, do të thosha unë, që të gjitha vajzat e gjimnazit, apo, more të gjithë qytetit, e kishin mendjen te Bardhyli”.

Bardhyl Xhama lindi në Fterrë të Sarandës në vitin 1933. Fterra, ky fshat piktoresk buzë Jonit të kaltër, fëmijëria në sokakët me kalldrëm, lanë mbresa të pashlyeshme, mbresa që do t’ua kthente fëmijëve përmes krijimtarisë së tij artistike.

Tre vëllimet e para të shkrimtarit, Përrallat e detit, Zhytësit e vegjël të thellësive  dhe Ekspedita e kaltër, janë treguesi më i qartë për këtë.

“Bardhyl Xhama e nisi krijimtarinë e tij me detin, për të dalë në stere”. Kështu u shpreh shkrimtari Skënder Hasko për krijimtarinë e Bardhyl Xhamës, krijimtari që dallohet për frazën e shkurtër e të zhdërvjellët, për koncizitetin e nivelin artistik.

Që nga viti i largët 1975, kur botoi vëllimin e parë Përrallat e detit, deri tek i fundit, Djali me tre brirë, plot 11 vëllime, autori Bardhyl Xhama ka botuar mbi 100 përralla, tregime e rrëfenja në shtypin periodik. Pjesët për teatrin e kukullave, radiotregimet e skenarët televizivë, zënë, gjithashtu, një vend të rëndësishëm në krijimtarinë e tij.

“Në vargjet e Bardhylit ka shumë tinguj, ka shumë muzikë, -u shpreh kompozitori Limoz Disdari. -Nëpërmjet këtij takimi ne kujtojmë fëmijërinë, dëshirat dhe brengat, çfarë realizuam e çfarë jo”.

Për veprimtarinë e Bardhyl Xhamës si mësues, foli studiuesi Jakup Mato. Ai theksoi ndihmesën e Bardhyl Xhamës për t’i dhënë emër gjimnazit të Sarandës në të gjithë vendin

Puna e tij në Gazetën “Mësuesi”  dhe Institutin e Studimeve Pedagogjike sollën natyrshëm titullin “Mësues i Merituar”.

“Në 14 vjet punë si gazetar e studiues, Bardhyl Xhama ka shkruar mbi 500 artikuj e studime pedagogjike”, - theksoi në fjalën e tij gazetari Guro Zeneli.

E përshëndetën shkrimtarin dhe bashkëfshatarë të tij e botues, me të cilët autori ka një bashkëpunim të vazhdueshëm, si dhe ish-nxënës të tij.